Automated poll di hingpit malampuson

CEBU, Philippines - Ang People’s Movement for Change (Pagbabago Cebu) kauban sa Workers’ Electoral Watch, ug Cebu Alliance to Reform Election sa ilang gipahigayong pag-monitor sa miaging eleksyon ug dokumentasyon, nakabantay sa mga iregularidad ug gihulagway nilang pagpanikas.

Sa pagsumada gikan sa ilang monitoring sa upat ka probinsya sa Bisayas nga gilangkoban sa Sugbo, Bohol, Southern Leyte, ug Biliran, nga adunay 10 ka syudad, 23 ka mga lungsod, 83 ka barangay, ug 88 ka mga voting centers nagpakitang dili tinuod ang pangangkon sa Comelec nga malampuson ang automated polls. Matud pa sa maong grupo nga tungod sa dinali-daling pagpangangkon og kalamposan wala gyud mahatagi og atensyon ang kadaghan sa mga na-disenfranchised nga mga botante tungod sa kalisod sa pagpangita sa lista sa ilang mga ngalan.

Daghang mipalpak nga precinct count optical scan machines, gubaong compact flashcards, mga gipang reject nga mga balota, ang pagkakulang sa impormasyon sa mga botante sa hustong paagi pagbotar, ug ang labaw sa tanan, ang taas nga linya ug maayong sistema ug proseso sa pagboto.

Gibutyag usab sa maong grupo nga daghan silang nasaksihang vote buying. Ug pipila sa mga presinto dugay kaayong nakasugod sa botasyon, mga Board of Election Inspectors ug Support staffs nga daghang kasaypanan, aduna pay mi-tamper sa selyo sa PCOS.

Pipila sa mga lugar ang nalangay og maayo sa pag-transmit sa mga resulta tungod sa mga problema nga naglakip sa kawalay signal, walay bakanteng modem sama sa nahitabo sa 88 ka mga voting centers sa Sugbo, 51 sa Bantayan Island.

Hinuon gidayeg sa grupo ang mga botante nga migawas gyud ug giantos ang kataas sa linya aron lang mobotar.  – BANAT NEWS