CEBU, Philippines - Ikaduhang batch sa drug test sa city hall sa dakbayan sa Talisay ipahigayon apan wala ibutyag ni Talisay City Administrator Richel Bacaltos kun kanus-a.
Matud niini nga sama sa pagpahigayon og random drug test sa unang batch niadtong buwan sa Pebrero dili usab nila ibutyag ang schedule sa ikaduhang batch aron masakpan gyud kung kinsang mga kawani ang drug users.
Gibutyag ni Bacaltos nga duna nay resulta sa drug test sa unang batch apan nagdumili siya sa pagtug-an kung duna bay mga positibo niini aron maprotektahan ang pamilya sa mga kawani.
Apan gipaniguro niini nga ipaubos sa due process pinasubay sa balaod sa civil service ang pagpahamtang og silot sa mga kawani nga napositibo sa drug test.
Si Bacaltos midugang nga wala nila masunod dayon ang ikaduhang batch nga ma-drug test tungod kay naukopado sila sa eleksiyon.
Kahinumduman nga ang siyudad mipaubos sa mga kawani sa city hall og random drug test tungod sa taho nga dunay mga empleyado sa city hall nga giingong mogamitan og ginadiling drugas.
Ug gikataho usab nga uban kanila anha pa mag-pot session sa mga bakanteng mga kwarto sa city hall atol sa break time.
Ang uban usab ang giingong magpanon ngadto sa usa sa mga barangay sa siyudad diin gidungog nga kuyanap ang pagpamaligya sa ginadiling drugas. – BANAT NEWS