Kapitan apil sa kasohan may labot sa strafing

CEBU, Philippines - Pasakaan karung semanaha sa kapolisan sa lalawigan ang barangay kapitan sa Kantobaon-1 sa lungsod sa Tabuelan sa nahitabong pagpangrakrak sa balay sa laing barangay kapitan sa Kanlohangon niadtong Mayo 9 sa buntag, usa ka adlaw sa dili pa ang eleksyon.

Kasong frustrated murder ang ipasaka sa Provincial Investigation and Detective Management Branch (PIDMB) sa Cebu Provincial Police Office (CPPO) batok ni Kapitan Deolito Almonacin.

Gawas ni Almonacin laing unom ang iapil sa pagpasaka og kaso diin ang tulo niini nailhan sa kapolisan nga mao sila si Ramil Baring, Oscarito Gulbin ug Leonilo Liquigan ug tulo ka ‘John Does.’

Si Almonacin maoy gipasanginlang mirakrak sa panimalay ni Kapitan Carlito Rondina Jr. niadtong Mayo 9. Ang duha ka kapitan pulos managlahi ang gisuportahang kandidato pagkamayor sa maong lungsod sa milabay’ng eleksyon.

Matud pa ni SPO4 Bert Hibaya, imbestigador sa PIDMB nga ilang gipatawag si Almonacin niadtong miaging adlaw diha sa provincial command.

Giingong giangkon sa kapitan nga iya ang maong motorsiklong Crypton nga nagtangag sa plakang GM 8499 nga narekober sa kapolisan sa crime scene nga giingong maoy gisakyan sa mga suspetsadong mirakrak sa panimalay ni kapitan Rondina.

Apan matud ni Hibaya nga hugot nga gipanghimakak ni Almonacin ang tanang pasangil nga siya apil sa misakay sa motorsiklo niadtong higayona ug miapil sa pagpangrakrak.

Matud pa ni Hibaya nga miingon hinuon kaniya si Almonacin nga nakaila kaayo ang kapitan sa tulo ka mga tawong mirakrak sa panimay sa biktima.

Si Sr. Supt. Erson Digal ang hepe sa kapolisan sa lalawigan nagkanayon nga bisan og gi-deny ni Almonacin ang tanang pasangil wala kini magpasabot nga makalingkawas na siya sa kasong ilang ipasaka tungod sa nakuhang mga ebidensya nga motorsiklo, empty shells sa .45 nga kalibre sa armas.

Matud ni Hibaya nga nagsugod ang panagbangi sa duha ka kapitan niadtong Abril 29 dihang gipaagi lamang sa pagbinaslanay sa text nga miresulta gyud sa pagpangrakrak sa suspek niadtong Mayo 9. – BANAT NEWS