CEBU, Philippines - Nangalandig sa tambalanan ang magtiayon human sila mangaigo sa bala nga gipauwan sa ilang balay sa wala mailhing tawo niadtong Lunes sa gabii diha sa sitio Pang-pang, barangay San Isidro, dakbayan sa Talisay.
Ang mga biktima mao si Jerry Malinao, 34, ug ang asawa niining si Luzviminda, 39, mga residente sa nahisgutang lugar.
Si Jerry nakaangkon og samad pinusilan sa likod nga bahin sa iyang hawak samtang ang asawa niini nakaangkon og samad pinusilan sa tuong abaga ug daling gidala sa Talisay City District Hospital apan gipangbalhin ngadto sa Vicente Sotto Memorial Medical Center.
Gikatahong kabahin sa bangi sa yuta ang hinungdan sa maong pagpamusil sumala pa sa pasiunang impormasyong nakaylap sa mga imbestigador.
Si PO1 Jundave David sa Talisay City Police Station kinsa usa sa imbestigador sa hitabo nga nahinabi sa Banat News nagkanayon nga ang magtiayon gikan pa sa ilang mga trabaho.
Ug pagsulod nila sa ilang balay kalit lang nga gipawong ang ilang suga o giputol ang linya sa ilang kuryente misunod dayon ang buto-buto sa armas. – BANAT NEWS