Roxas naglayag sa kadaugan
CEBU, Philippines - Basi sa opisyal nga Certificates of Canvass (CoCs) nga nakuha sa Aquino-Roxas Bantay Balota, si Liberal Party (LP) vice-presidential candidate nga si Senador Mar Roxas nakabaton og mayoriya nga mikabat sa 270, 000 botos batok ni Makati Mayor Jejomar Binay sa duha ka probinsya sa Luzon.
Si LP General Campaign Manager Florencio “Butch” Abad nagkanayon nga ang mga municipal COCs nga naangkon gikan sa ARBB volunteer group mipakita nga si Roxas labaw ni Binay og 192, 659 botos gikan sa Pampanga samtang ang tally sa Pangasinan, si Roxas labaw gihapon og 76,508 botos batok sa kandidato sa PMP.
Sa Pampanga, si Roxas nakaangkon og 413, 016 botos o 47.20% sa kinatibuk-an, samtang si Binay aduna lay 220, 357 botos o 25.18%, ikatulo si Legarda nga nakakuha og 14.81% o 129, 569 ka botos.
Si Roxas ang nag-una sa Pangasinan, diin nakakuha og 517, 563 ka botos o 42.04% sa kinatibuk-ang vote cast, si Binay nakakuha lamang og 441,055 o 35.82%. Ang General Campaign Manager nga si Abad, nagkanayon nga kining maong mga numero mao’y husto ug tinuod.
Siya misaway ug mihulagway sa gipakita nga resulta ni Binay kay matud pa usa lamang kadto ka tumo-tumo.
Ang LP nga mao ang nag-una sa mga partido sa bugnong lugaynon niadtong Mayo 10 adunay koneksyon aron makita nila ang ‘main server’ sa Commission on Elections.
Aduna usab silay kopya sa election returns ug ingon man sa COCs nga gamiton sa congressional Board of Canvassers alang sa ilang himoong eskutinyo sa mga botos sa presidente ug pagka bise presidente.
Si Abad midugang nga ang maong mga botos naggikan pa lang sa duha ka rehiyon ug ang ilang kampo masaligon nga dako ang ilang labaw ni Binay.
Ang mga nagbantay sa mga botos ni Aquino ug Roxas mibutyag nga mahimong ilampaso ni Roxas ang kaatbang niini nga si Binay kung mahilakip pagkuwenta ang mga botos nga nagagikan sa Rehiyon 6 nga naglangkob sa Aklan, Antique, Capiz, Guimaras, Iloilo ug Negros Occidental ,ug sa Rehiyon 7 diin nagsakop usab sa Bohol, Cebu, Negros Oriental ug Siquijor. (BANATNEWS)
- Latest
- Trending
