SRP paagian PUJ - Tomas
CEBU, Philippines - Si Mayor Tomas Osmeña, ang congressman-elect sa habagatang distrito sa dakbayan sa Sugbo uyon nga paagian na sa mga pampublikong sakyanan ang South Road Properties (SRP) nunot sa pagsugod na sa konstruksyon sa fly-over sa barangay Mambaling syudad sa Sugbo.
Gipaabot nga maghuot unya ang dagan sa trapiko sa dalan Natalio Bacalso Ave. gumikan sa pagpadayon sa maong proyekto sulod sa pipila ka buwan.
Usa sa nakit-ang diversion sa City Traffic Office Management ang pagtugot nga maagian ang SRP aron maluag-luagan ang kahuot unya sa N. Bacalso.
Ang maong flyover nga dunay upat ka lanes gibana-banang magkantidad og P159.6 million kon P380,000 budget per linear meter.
Kining proyekto unang gisugyot ni outgoing South District Kong. Antonio Cuenco ug karon gipundohan sa national government gikan sa Department of Public Works and Highways.
Base sa kasamtangang sitwasyon sa traffic matag adlaw diha sa N. Bacalso Ave. gikan sa City Traffic Operations Management, 13,771 ka mga sakyanan ang motabok niining lugara padulong sa downtown Cebu City.
Samtang 16,898 ka sakyanan usab ang padulong sa habagatang bahin sa siyudad, 6,881 sakyanan ang moliko sa SRP. Samtang 4,916 ka saktanan gikan sa habagatan ang moliko sa tuo sa SRP. Ang maong flyover usab maoy magkonektar sa N.Bacalso ngadto sa SRP.
Sa laing bahin, giklaro sa mayor nga posibleng iyang dawaton ang katungdanan nga himuon siyang National Economic Development Authority (NEDA) chief aron siya makatabang sa administrasyon ni Noynoy Aquino.
“I can help the local governments when I’m in NEDA. I don’t care whether I could get it or not, but at least in this way I could help the city,” matud pa sa mayor. (BANATNEWS)
- Latest
- Trending
