Radaza mipasalig nga may mahimo siya sa unang 100 ka adlaw

CEBU, Philippines - Ang napiling mayor Paz Radaza sa dsakbayan sa Lapulapu kagahapon mipasalig nga aduna siya’y mabuhat sa iyang paglingkod isip mayor sa dakbayan sa Lapulapu sulod sa unang 100 ka adlaw.

Gisandig niya ang tanan sa suporta ug kooperasyon nga itunol sa iyang administrasyon gikan sa sektor sa mga negosyante ug turismo sa maong dakbayan.

Matud pa ni Radaza nga kining duha ka sektor maoy dugokan sa kauswagan sa Lapulapu ug dako kaayo ang mahimo niini sa iyang administrasyon.

Miingon usab siya nga sa iyang pagka-kapitan sa barangay Mactan, sa maong dakbayan gi-organisa niya pag-ayo ang   Clean and Green Project, Solid Waste Management, Tourism ug ang Local Council of Women and Nutrition.

Karon nga mayor na siya sa tibuok dakbayan sa Lapulapu, gisaad ni Radaza nga ipadayon ang iyang mga maayong proyekto nga iya nang nasugdan kaniadto sa wala pa siya magpapili pagka- mayor sa maong dakbayan.

Midugang siya nga bisan dili siya perpekto, apan nasayud siya nga daghan nang kaayohan ang natagamtaman sa taga Lapulapu gumikan sa iyang mga paningkamot bisan niadtong usa pa lang siya ka kapitan sa barangay. Gawas sa mga proyekto nga daan na niyang giumol sa lider pa sa siya sa barangay Mactan, karong mayor na siya sa dakyanan sa Lapulapu, nalantawan niya nga usa sa angayan niyang hatagan og prayoridad mao ang edukasyon ug serbisyo medical alang sa katawhan.

Gawas niiini, iyang tun-an pagbalik ang mga proyekto nga may labot sa inprastraktura aron iyang makita kung asa na siya magsugod ug unsay iyang hatagan og prayoridad nga mga proyekto nga may labot niini. – BANAT NEWS