Cortes mopabaha'g mga proyekto ning ika-duha niyang termino

CEBU, Philippines - Gisaad ni Mayor Jonas Cortes sa dakbayan sa Mandaue nga iya nang ikapatuman karon kadtong mga proyekto nga wala niya ikapatuman sa una niyang termino.

Sa iyang pakig-atubang sa taga Banat News, kagahapon gibutyag ni Cortes nga gikalipay niya og daku nga gisaligan pa diay siya sa Mandauehanon pinaagi sa kadaugan nga iyang naangkon sa miaging piniliay.

Usa sa gisaad niyang ipatuman ning ikaduha niyang termino mao ang paghatag og desenti ug permanenteng yuta ug balay sa mga miyembro sa urban poor organization nga benepisyaryo sa mga proyekto alang sa urban poor organization.

Gani matud pa sa mayor nga may natukod na silang 14 ka panimalay alang sa 14 ka benepisyaryong miyembro sa urban poor sa barangay Lower Tipolo sa maong dakbayan.

Miabag sa maong proyekto ang   pipila ka Non Governmental Organization (NGO) nga naglakip sa Ramon Aboitiz Foundation Inc, (RAFI) ug uban pa.  

Si Mayor Cortes midugang nga unahon niya pagsiguro kadtong mga molupyo nga mahimutang sa kuyaw nga mga lugar, sama sa daplin sa kasapaan nga dali ra kaayong lunopan sa panahon sa tingbaha. Gawas niini kadtong benepisyaryo sa 9.2 ka ektarya nga luna nga papuy-an sa mga sakop sa urban poor nga naggikan sa mga barangay Tipolo, Guizo, Mantuyong, Subangdaku ug uban pang dapit sa dakbayan nga tukoranan usab og mga panimalay.

Matud pa ni Cortes nga ang 6.5 ka ektaryang luna sa barangay Paknaan sa maong dakbayan mao unta ang mahimong relocation site sa mga kabus kansang mga balay nahimutang sa kuyaw nga lugar ug sutaon ni Cortes kun mosugot ba niini ang mga konsehal.

Gidayeg usab ni Cortes ang mga benepisyaryo kinsa motabang sa pag-ugmad sa luna nga papuy-an kanila. – BANAT NEWS