CEBU, Philippines - Sugod karong adlawa, Mayo 17 hangtod sa Hunyo, ang National Statistics Office(NSO)7 mopahigayon sa 2010 Census of Population and Housing ( 2010 CPH).
Si Regional Director Ariel Florendo sa NSO Region VII, mihangyo sa matag panimalay nga mohatag og pagtagad sa mga kawani o kaha mga boluntaryo sa NSO nga moduol kanila ug manginterview.
Ang 2010 CPH maoy ika-13 nga senso sa populasyon ug ika-6 nga senso sa panimalay nga gitumong aron masayran ang katibuk-ang gidaghanon sa populasyon sa nasud ug sa mga panimalay nga gipanarok karong panahona.
Ang mahipos nga mga kasayoran sa NSO maoy basihanan sa kagamhanan sa tanang aspeto sa panggobiyerno niini sa natad sa pag-atiman sa mga katawhan, sa panginabuhi, edukasyon, panglawas ug sa katibuk-ang pagpuyo niini.
Dili lamang puro mga Pilipino ang iphon sa maong senso, kay ang mga langyaw nga nia dinhi sulod na sa usa ka tuig ilakip sila sa inihapay sa mokaping 6,500 ka mga kawani ug boluntaryong taga NSO.
Ang interview ipunting bahin sa pamilya, sosyal ug ekonomikanhong aspeto sa pagpuyo, lakip na ang kahimtang sa matag panimalay.
Si Florendo nagkanayon nga ang tukma ug kasaligan nga resulta sa 2010 CPH makuha lamang pinaagi sa bug-os nga kooperasyon sa tanan nga mohatag og hustong impormasyon ngadto sa mga maninso.
Mipasalig ang NSO nga ang tanang impormasyon nga makuha sa maong senso dili kini ipamatyag ngadto ni bisan kinsa, ug magpabilin kining sekreto.
Ang NSO mipasabot sa tanan nga ilang gahinan og pipila ka takna ang pag-alagad sa mga kawani sa NSO nga mosaka sa ilang balay ug makighinabi kanila ug dili angay nga mabalaka o mahadlok kay ang mga census personnel mopaila sa kamatuoran nga sila mga taga NSO. – BANAT NEWS