Lola giluba sa silingan

CEBU, Philippines - Nahiagum og lima ka samad ang kalawasan sa usa ka 70-anyos nga babaye human kini dunggaba sa iyang silingan didto sa Sitio Buayahan, barangay Capuputan Sur, lungsod sa Medellin sa miaging gabii.

Ang biktima mao si Clarita Andrino, 70, minyo, ug usa ka bota, nga taga Buayahan, samtang ang suspetsado mao usab si Vicente Otid, 42, ulitawo, nga iyang silingan.

 Si P/Insp. Bonifacio Arriesgado sa Medellin Police Station mibutyag sa Banat News nga ang biktima nagkaon sa sulod sa ilang balay dihang kalit kining gisulod sa suspetsado nga nagdala og hait nga hinagiban ug walay daghang langas giduslak dayon ang bota nga tiguwang.

Diha-diha mirespondi dayon ang kapolisan nga gipangunahan ni P/Insp. Arriesgado human nila madawat ang usa ka tawag sa telepono gikan ni Danny Ragasajo, paryente sa biktima.

Busa naabtan gyud sa mga otoridad ang suspetsado nga naggunit pa sa kutsilyo nga mao’y gigamit niya sa pagpanunggab.

Si Insp Arriesgado mibutyag nga dugay-dugay gyud nila nadakpan ang suspetsado tungod kay pwerti kunong idlasa niini, gani, gipasalbahan pa kini sa usa ka polis dihang misuway kini og ikyas aron mahilayo sa maong dapit.

Apan kun abtik siya mas abtik pa ang mga polis kay nakuptan ang iyang purol (maayo kay wala mahubo).

Gumikan sa kakusgan sa suspetsado, milugnot na usab kini bisan kun nakuptan na ang iyang purol, hinungdan nga gibatangan og layug sa kapolisan ug sa mga molupyo nga nakasaksi sa maong hitabo ug mikalma na kini dihang gibaliksan na og posas ang iyang duha ka kamot.

Matud pa ni Arriesgado gisuginlan siya sa mga silingan sa biktima, nga ang suspetsado adunay deperensya sa pangisip apan dihang didto na kini sa ilang buhatan, maayo mang nanubag sa mga pangutana.

Ang biktima nga nabulit sa mga samad linubaan sa dughan, bukton ug sa uban pang parte sa iyang lawas, gihatud dayon ngadto sa Bogo-Medellin Medical Center apan gibalhin ra usab kini sa Severo Verallo District Hospital sa dakbayan sa Bogo.

Samtang ang suspetsado nga mikagulkol na sa prisohan gitakdang pasakaan og kasong frustrated murder sa kapolisan karong adlawa. – BANAT NEWS