CEBU, Philippines - Napunggit ang itlog sa usa ka mag-uuma dihang kalit nga mibuto ang iyang giluklok sa purol nga armas de fuego samtang miyaka kini sa yuta kay mitan-aw sa tigbakay atol sa piyesta sa Sitio Colo, barangay Kahumayhumayan dakbayan sa Danao sa miaging hapon.
Ang biktima mao si Antonio Borlas, 56, minyo, ug mag-uuma, nga taga sitio Portland, sa maong barangay sa Danao.
Si SPO2 Luis Perales sa Danao City Police Station mibutyag sa Banat News nga ang biktima nalingaw kaayo pagtan-aw dihang nagkombati na ang mga manok nga may mga tari.
Aron matagbaw og tan-aw miyaka kini sa yuta, apan wala damha nga mipaka lang og kalit ang iyang armas de fuego nga gisulod sa bulsa sa iyang purol ug gitusak sa bala niini ang iyang itlog.
Dali kining gihatod ngadto sa Danao City District Hospital apan gibalhin kini sa tambalanan sa dakbayan sa Sugbo.
Si SPO2 Peralez midugang nga wala nila masuta kun unsang kalibreha ang armas nga nakaunay sa biktima kay matud pa gitagoan dayon kini sa mga kabanay .
Gi-operahan kuno dayon ang itlog sa biktima matud pa sa kapolisan. – BANAT NEWS