Wala tinggi sa asawa 58-anyos naghikog

CEBU, Philippines - Patay ang usa ka 58-anyos human kini gituohang naghikog sa ilang panimalay sa sitio Camparang, barangay El Pardo lungsod sa Boljoon pasado alas 6:00 sa buntag sa milabay’ng adlaw gumikan kay wala na nga tingogi sa iyang kapikas.

Ang namatay nailang si Rodulfo Pateres, 58, kinsa nakit-an nalang sa iyang anak nga si Mary Joy Pelonio, 25, nga nagbitay na.

Si Pelonio gikatahong giimbitar sa amahan nga diha mamahaw sa iyang balay apan nakugang nalang kini nga napalgang nagbitay ang amahan nga patay sa ilang kusina ug may gibulibod nga ‘nylon rope’ sa liog niini.

Matud pa ni SPO2 Rogelio Fernandez, admin officer sa Boljoon police station dihang nahinabi sa Banat News base sa pamahayag nga ilang nakuha sa 14-anyos nga anak sa namatay, gisigehan na og badlong sa iyang inahan nga si Renada ang namatay tungod sa pagsige niini og hubog-hubog.

Apan giingong wala kini mopatuo hinungdan nga wala na kini tinggi ni Renada ug maoy gituohang hinungdan nga kini naghikog.

Walay nakitang suicide note nga gibilin sa biktima apan ilang napalgan ang usa ka gamay’ng papel nga may suwat diin niini gibilin ang iyang sweldo nga P3,730. – BANAT NEWS