2 lalaki nahu'g sa atabay, patay

CEBU, Philippines - Duha ka mga managhigala ang namatay sulod sa usa ka karaang atabay nga ilang gilimpyuhan kagahapon sa buntag diha sa sulod sa usa ka piggery sa sitio Riverside Lower Ponce sa barangay Capitol Site ning dakbayan.

Si SPO4 Alex Dacua, imbestigador sa Homicide Section sa Cebu City Police Office sa pakighinabi sa Banat News mibutyag nga patay nang nahulbot gikan sa gibana-banang 20 ka tiil nga gilawmong atabay sila si Wendel Obregon, 28, usa ka drayber sa traysikad ug residente sa maong dapit ug higala niining si Marlon Dilao, 32, kanhi residente sa maong lugar ug didto na sa Tabuelan magpuyo.

Sumala pang Dacua, ang duha gisuholan ni Felimon Bruce, 68, nga dunay baboyan diha sa maong dapit aron limpyuhan ang maong atabay sa kantidad nga P2 mil.

Base sa pamahayag ni Bruce kang Dacua, unang mikanaog sa ilawom si Obregon apan kalit lang kining nadakin-as ug nitibugsok sa ilawom hinungdan nga nagkara-kara si Dilao pagsalbar kaniya.

Gikatahong nagpunay pa og isa si Obregon sa iyang kamot apan dihang nakab-ot kini ni Dilao dangog kini ug nabuhian apan sa tantong pangusog ni Dilao hasta siya naapil og kahagbong sa ilawom.

Ang duha giingong wala na motunga pa hinungdan nga nagdali si Bruce pagpangayo og tabang.

Ang mga sakop sa Emergency Rescue Unit Foundation nga miresponde sa maong dapit mao nay nakakuha sa duha ginamit ang pisi apan pulos wala na silay kinabuhi.

“Ang atong initial nga pagtan-aw nalumos ni sila pero nahibulong ko kay wala man mobutod ang tiyan, ang medico legal nalang unya maoy mo-determine kun nalumos ba sila sa tubig o nahutdan sila og hangin,”matud pang Dacua.

Ang maong karaan na kaayong atabay nasudlan og lapok ug tubig baha duha ka tuig na ang nakalabay, apan gumikan sa kainit sa panahon ug nihit na ang tubig buot na unta kining gamiton ni Bruce alang sa iyang baboyan.

Nagtuo si Dacua nga dili lang pulos tubig ang sulod sa maong atabay kUndili sagol na gyud kini og lapok maong naglisod ang duha sa pagpalutaw.

Samtang ang igsuon ni Obregon nga si Phearly sa pakighinabi sa Banat News mibutyag nga sayo sa buntag miadto si “Manoy” (Felimon) sa ilaha kay pakyawon sila pagpalimpyo sa atabay.

Sumala pa niini una pa milakaw ang magulang gihagwa-hagwa pa sila niini.

Ang amahan ni Obregon nga si Danilo,51, mitug-an sa Banat News nga naglisod sila og tubig karon gumikan kay kanunay’ng walay agas ang gripo.

Tungod man gud ning wala tay tubig, namatyan hinuon ta,” matud pa sa masulob-ong si Danilo. – BANAT NEWS