1 ra ka boto ang naihap sa 600 ka botante

CEBU, Philippines - Gipasakaan og reklamo sa One Cebu Party ang municipal election officer sa lungsod sa Lilion diha sa Provincial Comelec Office tungod kay adunay barangay nga usa lamang ka boto ang naihap sa precinct count optical scan machines atol sa piniliay niadtong milabay’ng Lunes.

 Ang gireklamo sa One Cebu Party nga gipangulohan ni Gob. Gwendolyn Garcia mao si Liloan municipal election officer Jezreel Amoguez.

 Sumala pa ni Amoguez nga si Atty. Christina Garcia Frasco maoy miduol sa Provincial Comelec Office ug mireklamo nganong usa lamang ka boto ang nabasa sa usa ka PCOS machine sa barangay Mulaw lungsod sa Liloan nga duna man unta kini dili mominus 600 ka mga botante.

 Matud pa ni Amoguez nga gusto sa naasoy’ng partido nga maihap pagbalik ang mga botos sa maong barangay pinaagi sa manual counting.

 Sigon pa ni Amoguez nga nabalaka siya pag-ayo sa maong reklamo tungod kay makaapektar kini sa iyang retirement lima ka tuig gikan karon.

 Iyang gipasabot nga wala siya’y labot sa maong kakulian tungod kay technical kaayo ang problema kay bisan gani ang technician sa Smartmatic dili makasulbad sa “null votes” nga na-reflect ngadto sa municipal canvass ug ingon man ang usa lamang ka boto ang nabasa diha sa Consolidated Canvass System.

 Andam hinuon siyang motubag sa maong reklamo ug sa hangyo niining iphon og balik ang botos pinaagi sa manual counting. (BANATNEWS)