Nila ni Darrel Carumba ug Cerie Gamboa

CEBU, Philippines - Gitulis sa gibana-banang lima ka mga armadong tulisan ang usa ka pawnshop ug gidis-armahan ang duha ka gwardiyang giingong nangatulog niadtong tungura diha sa barangay Cantipay lungsod sa Carmen niadtong Biyernes sa alas 11:35 sa gabii.

Ang gitulis mao ang M. Lhuillier Pawnshop nga gipanag-iya sa magpapatigayong si Micheal Lhuillier nga nahimutang sa maong lugar, gikatahong nasakiyo ang tanang kwartang P300 mil nga alang unta sa suholan sa mga empleyado.

Matod ni PO2 Dario Baguio sa Carmen Police dihang nahinabi sa Banat News subay sa imbestigasyon gisulod sa mga tulisan ang compound ug gipangdis-armahan ang duha ka gwardiyang sila si Sydney Delos Reyes ug Ellizer Molena, nga mga sakop sa Standout Security Agency Incorporated.

Ang duha gikuhaan sa ilang tagsa ka kalibre .38 rebolber nga service firearms ug gipangtionan samtang ang ubang tulisan misulod sa opisina.

Nasuta sa mga imbestigador nga giguba sa mga tulisan ang bintana sa opisina aron makasulod ug gihurot og kuha ang payroll money dayung sibat pahilayo paingon sa barangay Catipay Proper.

Ang mga polis nga miresponde sa crime scene naka-recover og demand letter nga naka-address ngadto sa administrador nga si Edward Loop nga may nakasuwat nga: “Sir, ang akong grupo maoy nagdala sa tingog og reklamo sa tanan nimo trabahante kabahin sa gipangayong umento sa sweldo nga wala nimo hatagi og bili.”

Dugang pa sa gisuwat sa tulisan ang mga pasalig ug benepisyong wala ihatag sa maong kompanya ngadto sa ilang mga empleyado ug mihulga kang Loop nga kun dili mo-resign sa maong kompanya sunogon sa mga tulisan ang maong establisamento.

“Ang prebelihiyo sa dressing plant wa gihapon nimo ihatag nga unta ikaw man ang nipasalig nga imong ihatag ug kun makatuman sa mga kundisyon. Bakakon ka! Tungod niini nasuko kami kanimo, ug sample pa kining among gibuhat ug mapugos kami pagbagat kanimo sa labing dali kun dili ka mopahawa dinhi. Dauban namo ang tanang properties sa M Lhuillier,” sumala pa sa suwat.

Nunot sa maong suwat, nagduda karon ang kapolisan nga posibleng ‘inside job’ ang nahitabo sanglit gawas sa maong demand letter nasuta sab sa kapulisan nga suhito kaayo ang mga tulisan pagsulod sa gibutangan sa kwarta nga wala pa matino ang kantidad sa paghimo ning balita.   (BANATNEWS)