Salapi ug cellphone gipupho sa tulisan

CEBU, Philippines - Nahanaw daw aso ang salapi, cell phone ug mga linatang pagkaon, dihang gipamupho kini sa wala hiilhing mga tulisan sulod sa usa ka tindahan sa barangay Cabancalan, dakbayan sa Mandaue sa miaging kaadlawon.

Si SPO1 Dexter Martin nga nahinabi sa Banat News miingon nga ang tag-iya sa tindahan nga si Loren dela Cruz, 30, minyo, nga nagpuyo sa maong dapit nagtibi nga mitug-an kanila nga kuyog niiini ang iyang tindera nga si Marilyn Quinsay, 17, sa   pagbantay sa iyang tindahan.

Apan nakurat nalang sila dihang kalit   nga misulod ang duha ka wala hiilhing lalaki nga nagpakaaron-ingnon nga kustomer ug namili kini sa gi-display nilang baligya ug mga linatang pagkaon.

Nagtuo si Dela Cruz nga mobayad ang maong mga lalaki sa ilang gikuha nga mga linatang pagkaon dihang sa pagduol niini kaniya, kalit siyang gitionan sa armas de fuego dungan ang pagdeklarar nga tulis.

Gumikan niini, gipasagdan niya ang maong mga tulisan nga miabli sa iyang kaha ug gikuha ang cash nga P2,500, duha ka cellphone ug ang mga nagkalainlaing mga baligya lakip na ang mga linatang pagkaon nga gisakiyo niini sa ilang paggawas sa tindahan.

Dali ra kaayong nakasibat ang maong mga tulisan kay may nagpaabot kanilang motorsiklo nga maoy ilang gisakyan pahilayo sa maong lugar.

Si SPO1 Martin miingon nga naluya sila og pangita sa maong mga tulisan.   (BANATNEWS)