CEBU, Philippines - Kritikal ang kahimtang sa usa ka 7-anyos nga batang lalaki human kini mapusili sa mata og toy gun nga gibalaha’g ‘jolen’ sa iyang kaduwa diha sa sitio Cogon, barangay Aguho lungsod sa Daanbantayan pasado alas-9 sa buntag sa milabay’ng adlaw.
Matud pa ni PO2 Henry Compuesto sa Daanbantayan dihang nahinabi sa Banat News nga ang maong biktima nagduwa-duwa lang kini uban ang iyang silingan nga 12-anyos dihang giayo ang duwaan nga pusil.
Gilili kini sa biktima ug wala gyud mabantaying adunay sulod nga jolen sa maong duwaan ug aksidenteng nakablitan sa suspetsado ug maayong pagkaigo sa mata niini.
Sumala pang Compuesto nalubong gyud sa ilawom sa tuong mata sa bata ang jolen hinungdan nga gidali kini pagdala ngadto sa Daanbantayan District Hospital.
Apan gumikan sa kagrabe sa pagkalubong niini ug delikado ang proseso sa pagtangtang sa jolen diha sa ilawom gibalhin nalang kini sa Don Vicente Sotto Memorial Medical Center.
Si Compuesto mibutyag nga ang maong toy gun ginama lamang sa pvc pipe nga gigamitan og electric igniter sama sa gigamit sa paghimo og mga lantaka apan kini gamay lamang nga pvc pipe aron mahaom ang jolen isip bala. (BANATNEWS)