Alcover mipagamay ni Odilao

CEBU, Philippines - Si Kongresista Pastor Alcover Jr. sa ANAD Party-list nagkanayon nga dili angayang hatagan og importansiya nga tubagon niya si kanhi Customs Collector David “Boy” Odilao, ang ANAD Party-list first nominee,sa mga pasangil niini batok kaniya.

“Not worth of commenting he is nobody in ANAD”, ni Alcover pa dihang nahinabi sa Banat News kagahapon.

Gibutyag ni Alcover nga aduna silay planong magpahigayon og dakung rally aron ipakita kang Odilao nga mas daghan siya (Alcover) og kaalyado.

Gihagit usab niya si Odilao nga mo-produce usab unya og samang gidaghanon sa mga tawo nga mokuyog sa iyang rally.

Ang kongresista mipasangil kang Odilao nga pulos lang binuang ang mga pasangil niini batok kaniya ug igo lang kining midawat og limpiyo tungod kay sa kaugmaran sa ANAD walay gikatabang si Odilao.

Si Alcover midugang nga sa pagpangampaniya sa ANAD, walay gasto si Odilao ug igo lang kining nagpa-advertise sa pamantalaan, dili sama kaniya nga naghago ug migasto gyud sa pagpangampaniya.

Kahinumdoman nga ang kampo ni Odilao mipasangil kang Alcover nga gihimong family enterprise ang ANAD tungod kay ang mga gipiling nominee niini giingong anak niya, linudhan sa kasal, ug ig-agaw sa kongresista.

Kahinumdoman usab nga si Odilao mipasangil nga siya ug sila si Paul Garbunales ug Ferdie Maigue gipanaktak ni Alcover isip staff sa ANAD nga walay due process of law tungod kay wala sila mosugot sa paagi ni Alcover nga si Jonas Coraje Go, usa ka none –staff sa ANAD nga maoy mokuha sa ilang sweldo, allowance, ug uban pang monetary benefit, ubos sa Special Power of Attorney (SPA).

Ang kampo ni Odilao miduso og reklamo ngadto sa Comelec sa Manila sa pag-disqualify kang Alcover. (BANATNEWS)