CEBU, Philippines - Si konsehal Shirley Belleza kinsa motak-op na sa ikatulong termino niya karong Hunyo 30, mibutyag kagahapon nga nagpaabot siya nga tumanon sa grupo sa administrasyon ang gisaad niini ngadto kaniya nga pahupton og posisyon isip Public Information Officer (PIO) diha sa city hall sa Talisay.
Si Belleza diha sa konseho sa katapusan niyang termino human sa election niadtong Mayo 2007 hangtod karong Hunyo 30, ug niining tuiga wala na siya mokandidato kay misuporta siya sa iyang bana nga si kanhi Bise Mayor Aberdovey Belleza.
Kahinumdoman nga ang konsehala mao ra og giinitan sa iyang mga kaalyado sa administrasyon tungod kay gidudahan kining midapig na gyud ngadto sa oposisyon sa milabay’ng eleksiyon.
Gipasabot niya nga lisod ang iyang sitwasyon tungod kay dili siya makatalikod sa iyang bana apan iyang gitataw nga ang iya rang bana maoy iyang gisuportahan sa milabay’ng piniliay.
Matud ni Belleza nga wala pa siya malimot sa gisaad kaniya sa iyang mga kaubanan sa administrasyon nga itudlo siyang PIO sa city hall human sa iyang termino. (BANATNEWS)