Pagbalhin ni Bernaldes gikatingala; Bernaldes: Ok ra

CEBU, Philippines - Daghan ang nalipay apan duna puy naguol sa pagbalhin sa regional director sa Land Transportation Franchising and Regulatory Board (LTFRB)-7 nga si Romulo Bernardes kinsa gipulihan sa Sugboanong si Benjamin Go.

Ang presidente sa CITRASCO nga si Ryan Yu nagkanayon nga wala gyud siya magdahom nga mabalhin og laing lugar si Bernardes taliwala sa kontrobersya ug pasangil sa mga transport operators dinhi sa Sugbu diin ang Metro Cebu Taxi Operators Association (MCTOA) nga siya maoy responsable sa pagdaghan sa mga taxi units.

Ang pasangil sa transport operators butang nga gisuportahan usab ni Mayor Tomas Osmeña ug karun Congressman Elect sa Cebu South District sa nakalabay’ng piniliay.

Matud pa ni Yu nga wala siya magtuong nadugangan ang mga taxi units sa Sugbu ug ang maong pasangil maoy hinungdan nga nabalhin si Bernardes ngadto sa rehiyon 3 sa Pampanga.

Si Yu mipasalig hinuon nga ilang suportahan ang bag-ong direktor sa bisan unsang programa nga himuon niining makaayo sa transport group.

Sa iyang bahin si Bernardes mitataw nga wala siya nasagmuyo ug kahiubos ngadto ni Osmeña ug sa mga transport groups.

Iyang giklarong ang pagbalhin kaniya tipik ug kabahin kini sa iyang trabaho ug isip usa ka ‘buotang sundawo’ andam siyang madestino sa bisan asang lugar sa nasud.

Matud ni Bernardes siya ray tawo nga dili magdumot og tawo kay wala kana sa iyang personalidad nga madinumtanon sa isig ka ingon. (BANATNEWS)