2 babaye gi-ambush, 1 patay, drugas gisusi
CEBU, Philippines - Gidudahang adunay kalambigitan sa illegal nga drugas ang hinungdan sa pagpamanhig patay sa usa ka babaye ug miangol sa laing babaye diha sa sitio Saac 1 barangay Buaya dakbayan sa Lapulapu sa milabay’ng hapon.
Ang biktima mao si Laura Amodia Alegres, 49, ug Lucricia Paquibot Tero, 39, mga residente sa sitio Soong sa Mactan dakbayan sa Lapulapu.
Base sa pasiunang imbestigasyon ni PO1 Maximo Villagonzalo Jr. sa Crime Against Persons Desk nasayran nga samtang luwan sa awto ang duha gikan sa City Hall sa dakbayan sa Lapulapu pauli sa Mactan duha ka motorsiklong adunay duha ka tawong luwan niini nagsunod ngadto sa mga biktima.
Pag-abot sa nahitaboan kalit nga mi-overtake ang maong mga motorsiklo dayong pamusil ngadto sa mga biktima, si Alegres naigo katulo sa dughan ug usa sa aping, samtang si Tero naigo sa tiyan gamit ang kalibre .45 sa mga mamumuno.
Si Alegres gideklarar nga patay na sa dihang miabot sa Mactan Doctors Hospital samtang si Tero anaa pa ubos sa obserbasyon sa mga mananambal.
Sa pagresponde sa kapolisan lima ka mga basiyo sa bala sa kalibre .45 ang nakuha sa crime scene, samtang pakyas kini sa pagsikop sa mga mamumuno.
Nasayran sa Banat News nga si Alegres sa panahon pa ni kanhi Lapulapu City Police Office Director Sr. Supt. Louie Oppus nasikop na kaniadto sa kasong kalapasan sa Akta Republika 9165 ubos sa Sec. 5 Art. II kon pagpamaligya og illegal nga drugas, apan gibasura sa korte.
Pipila ka mga sakop sa kapolisan nga nahinabi sa Banat News mipadayag nga posibleng adunay kalambigitan sa illegal nga drugas ang pagbanhig sa duha ka biktima.
Si PO1 Villagonzalo mibutyag nga naglisod sila pagpangayo og dugang impormasyon gikan sa mga kabanay ni Alegres samtang wala usab tuguti silang mapa-awtopsiya ang patay’ng lawas niini. (BANATNEWS)
- Latest
- Trending
