Sample Ballots gipangsunog

CEBU, Philippines - Naalarma ang kapolisan sa lungsod sa Compostela human sila makadawat og tawag gikan sa Office of the Mayor nga nagpahibalo kabahin sa mga opisyal nga balota sa milabay’ng Mayo 10 nga eleksiyon nga gipangsunog sa usa ka luna sa barangay Bagalnga kagahapon sa hapon.

Ang taho nagkanayon nga “half-burned” kun katunga sunog na ang mga balota nga maoy ipangpansak sa Precinct Count Optical Scan (PCOS) machines.

Human madawat sa Compostela Police Station ang taho, gipadad-an dayon ni Sr. Insp. Milo Dagasdas, hepe sa kapolisan og mga sakop sa Special Weapons and Tactics (SWAT) ug mga tinugyanan sa Municipal Treasurers Office aron guwardiyahan ang mga sinunog nga balota nga giingong gisagol sa mga basura.

Si Sr. Insp. Dagasdas miingon nga alas 4 kagahapon sa hapon nadawat nila ang impormasyon kalabot sa maong mga official ballots.

Matud pa ni Sr. Insp. Dagasdas nga sa dihang ilang gisusi ang maong lugar, ang mga abo sa gisunog nga mga gituohang basura ug mga plastic sa mga juice ang una nilang nakit-an.

Apan bisan pa man og mao na lang ang ilang naabtan ang maong sinunog nga basura, mikuha gihapon sila og sampol sa mga abo aron ipasusi sa Crime Laboratory sa kapolisan aron sutaon kun tinuoray ba naapil pagkasunog ang gituohang mga opisyal nga mga balota base sa nadawat nga taho.

Samtang si Sr. Supt. Erson Digal, hepe sa kapolisan sa lalawigan sa Sugbo mihimakak nga mga balota ang gipangsunog.

Apan matud ni Sr. Supt. Digal nga bisan pa man og negatibo ang resulta niini, mimando gihapon siya nga pa-imbestigahan ang maong taho. – BANAT NEWS