Lolo naligsan patay

CEBU, Philippines - Usa ka lolo ang namatay dihadiha human maligsi sa usa ka bus de pasaheroan kagahapon sa alas 5 sa kaadlawon South Road Poblacion, Pardo.

Ang naligsan nailhan nga si Sofronio Geralizo, 74, molupyo sa Sunrise Village, Pardo samtang ang drayber sa bus nailhan nga si Marcel Alonzo Amancio, 42, taga barangay Manangal, lungsod sa Dalaguete.

Base sa imbestigasyon sa kapolisan sa Pardo nga ang BB Gemma (GWD-238) paingon sa siyudad sa Sugbo gikan sa habagatan.

Ang drayber mialegar nga wala niya mamatikdi nga ang tigulang milabang sa karsada ug iyang naligsan.

Human sa hitabo, ang drayber mitahan ngadto sa Pardo Police Station.

Sa pakighinabi sa Banat News ni Manuel Tagaan sa Traffic Section, mibutyag kini nga ang pamilya sa biktima ug ang representante sa BB Gemma nagkasabot kalabot sa paghatag og burial assistance ug insurance ngadto sa namatay. Apan matud pa ni Tagaan nga dili usa kini nila ibutang sa logbook hangtod wala pa mahatag sa tagdumala sa BB Gemma ang gipangayo sa pamilyang Geralizo.

Samtang ang drayber sa bus giingong buhian na kini karong adlawa human sa 36 oras nga pagkatanggong apan walay napasaka nga kaso. – BANAT NEWS