CEBU, Philippines - Nalandig sa tambalanan ang usa ka 37-anyos nga lalaki human kini pusila sa usa sa tulo ka mga wala mailhing lalaking nag-motorsiklo niadtong Martes sa gabii sa sitio Uldog, barangay Cansojong, dakbayan sa Talisay.
Ang biktima giila ni PO3 Mikie Espina sa Talisay City Police Station nga si Jonathan Yborda, residente sa nahisgutang lugar. Nakaangkon kini og samad pinusilan sa buko-buko ug daling gidala sa Talisay District Hospital sa iyang amo apan tungod sa kahimtang niini gibalhin ngadto sa Vicente Sotto Memorial Medical Center.
Si PO3 Espina nga nahinabi sa Banat News kagahapon nagkanayon nga si Yborda tabang-tabang sa usa ka negosyante kinsa supplier og mga Labana (Guyabano) diha sa merkado sa Tabunok.
Matud ni Espina nga nagduda sila nga dili si Yborda ang pusilon kun dili ang amo niining si Ernesto Baring.
Sa wala pa mahitabo ang insidente nagsakay sa tangkal-tangkal nga gimaneho ni Baring gikan sa Tabunok naghatod og mga Labana paingon nang mopauli.
Gawas kang Yborda nga sakay sa sidecar sa tangkal-tangkal kauban niyang sakay ang asawa ni Baring nga si Remegia ug ang minor de edad nga si Divine Grace Casio.
Tulo ka lalaki kinsa nagsakay og usa ka Aura nga motorsiklo kolor puwa giingong nagsunod nila ni Yborda ug usa sa angkas niini ang kalit lang namusil.
Ang giingong tumong sa maong pagpamusil si Baring apan nakabantay kini ug nakahupo hinungdan nga si Yborda maoy naigo.
Matud ni Espina nga natahap siyang dili tulis ang motibo sa maong pagpamusil tungod kay mibiya dayon ang nahisgutang mga lalaki ug atol sa maong hitabo dunay dalang kwarta si Baring nga halin sa iyang mga Labana.
Usa sa gitutokan sa mga polis nga motibo sa maong hitabo nga posibleng dunay atraso si Baring o ba kaha dunay nasuya niini kabahin sa negosyo. - BANAT NEWS