Flower Arranger giiloga'g 'cab gipusil

CEBU, Philippines - Talandugon ang kahimtang ang usa ka flower arranger human kini pusila sa usa sa duha ka wala mailhing tulisan samtang kini nagpaabot sa iyang asawa diha sa P. Gomez Street ning dakbayan kagahapon sa hapon sa alas 2:30.

Ang biktima giilang si Jonathan Pantoñal, 37, taga Wireless, dakbayan sa Mandaue.

Matud pa ni Pancho Ramirez, barangay kapitan sa barangay Sto. Niño nga nahinabi sa Banat News nga ang biktima nagtambay diha sa gawas sa trabahoan sa iyang asawa kay iyaha unta kining kuhaon nga mogawas ug magdungan unta sila pagpauli.

Apan kalit lang miabot ang duha ka tulisan ug mipusil kaniya ug daling mikuha sa iyang puting multicab nga nagtangag sa plakang GTC-842.

Ang biktima nakaangkon og samad pinusilan sa bukobuko lapos diha sa atubangang bahin ug naapil ang tumoy sa iyang kinatawo. - Cerie Uy Gamboa ug Lesley Caminade (BANAT NEWS)