Bernaldes gitaktak

CEBU, Philippines - Gitangtang na sa pagka-regional director sa Land Transportation Franchise and Regulatory Board kon LTFRB-7 si Romulo Bernaldes sugod kagahapong adlawa.

Kini may kalambigitan sa reklamo sa mga miyembro sa Metro Cebu Taxi Operators Association kon MCTOA kabahin sa mga pasangil nga may anomalya sa pagpamaligya og prangkisa sa mga taksi dinhi sa rehiyon.

Si Presidential Assistant Ariel Lim ang head sa Public Transportation Affairs sa Malacañang, nagkanayon nga ang pagtangtang kang Bernaldes maoy nakab-ot nga desisyon sa tigum tali sa iyang buhatan, Department of Transportation and Communication DOTC Sec. Anneli Lontoc ug LTFRB Chairman Alerto Suansing niadtong nakalabay’ng bulan.

Kini aron matubag ang reklamo sa mga miyembro sa MCTOA nga gipangulohan ni Richard Cabucos ug gisuportahan ni Cebu City Mayor Tomas Osmeña labot sa padayon ni Bernaldes sa pag-isyu og prangkisa sa taxi.

Gipasanginlan si Bernaldes nga namaligya og prangkisa bugti sa dakong kantidad bisan og may kamanduan na nga ipahunong kini tungod kay daghan na kaayo ang nagdagan nga taxi units ug nagkagamay ang kita sa mga taxi drivers.

Matud pa ni Lim nga iya nang gikunsolta si Osmeña ug si Gob. Gwendolyn Garcia sa pagbalhin kang Bernaldes tungod kay ikaayo man kini sa kinabag-an.

Mipuli ni Bernaldes isip LTFRB-7 regional director mao si Benjamin Go nga usa ka Sugbuanon ug nadestino kaniadto sa Region 3 nga mao karon ang gibalhinan ni Bernaldes.

Si Go giubanan mismo ni Lim kagahapon sa bag-o niining buhatan.

Gitataw ni Lim nga mahimong mahunong na ang imbestigasyon sa ilang buhatan sanglit miuyon man kining mabalhin na lamang sa laing lugar aron maundang na ang protesta batok kaniya.

Samtang si Cabucos mipadayag sa ilang dakong kalipay sa pagkatangtang kang Bernaldes apan bisan paman ilaha gihapong padayunon ang reklamo batok niini diha sa Ombudsman tungod kay klaro kaayo kining niabuso sa iyang gahum.

Si Go sa iyang bahin mipasalig nga iyang undangon ang dili makatarunganong pag-isyu og prangkisa, imbestigahon ang mga anomaliya ug imbentaryohon ang tanang na-isyung prangkisa sa iyang buhatan.

Mipasalig usab si Go nga dili siya mopatuman og mga bag-ong polisiya nga walay pagkonsulta sa mga Local Government Units ug sa mga operators aron dili na masubli pa ang kontrobersiya nga gisudlan ni Bernaldes.

Nasayran sa Banat News nga ang pagtangtang ni Bernaldes sa LTFRB-7 dugay na untang ipatuman. Gani mipahigayon na og despidida party si Bernaldes niadtong Mayo 4 ning tuiga.

Apan gilugwayan lamang kini sa LTFRB hangtud na nahuman ang presidential election niadtong adlaw nga Lunes. - BANAT NEWS