Salimbangon mokiha gyud

CEBU, Philippines - Mosang-at og daghang kaso ang kampo ni congressman-elect Benhur Salimbangon sa ikaupat nga distrito batok sa pamilya ni Bogo mayor-elect Celestino "Junie" Martinez human sa insidente niadtong Lunes sa barangay Pulangbato, dakbayan sa Bogo nga nangatanggong ilang mga sakyanan lakip na ang sakyanan sa mga sakop sa media ug militar.

Si Salimbangon sa press conference kagahapon mibutyag nga gitun-an karon sa iyang mga abogado ang posibleng pagpasaka og kasong serious illegal detention batok sa mayor, asawa nga si Clavel ug anak niini nga si Celestino "Tining" Martinez ug Bise Mayor Santiago Sevilla. Gitun-an usab ang paglakip sa ubang nalambigit sama sa supporters sa pamilyang Martinez ug mga sakop sa City of Bogo Anti-Crime Task Force (CBACTF).

Gireklamo usab ni Salimbangon nga sa Pulangbato, wala makabotar ilang mga supporters tungod kay gipalabi sa paghatag og priority numbers ang supporters ni Martinez.

Si Daphne Salimbangon, anak sa kongresista, mitug-an nga iyang nakit-an si Junie nga mibabag sa tunghaan ug miinsulto sa iyang amahan pag-abot niini pinaagi sa pag-ingon: “You are not allowed to enter here... Why are you here?”

Matud ni Daphne didto na magsugod ang komosyon sa dihang miabot si Tining nga nagdagan ug mimando matud sa mga polis nga ipa-search ang ilang sakyanan sa pasangil nga dunay daghang armas ang sulod niini.

 Pasakaan usab og kasong disbarment ang legal counsel sa pamilyang Martinez nga si Atty. Carlo Martinez ug lain pang duha ka abogado.

Apan nasagmuyo usab si Salimbangon ngadto sa mga sakop sa media nga nagkober niadtong higayona nga dili makiangayon human migawas ang balita nga sila gipasanginlan nga dunay daghang goons.

Matud pa niya nga wala gyuy nahimo ang mga polis niadtong higayona kay ang hepe sa Bogo Police Station nga si Supt. Julian Entoma giliaban pa ni Clavel.

 Giawhag ni Salimbangon si PRO-7 director Chief Supt. Lani-O Nerez sa pag-imbestigar ni Supt. Entoma ug superbisor sa kapolisan sa lalawigan nga nagbantay sa Bogo nga si Sr. Supt. Eduardo Ingking.

Ang mga Martinez gisulayan og tawag apan napakyas ang Banat News pagkuha sa ilang habig. – BANAT NEWS