Danao malinawon kaayo

CEBU, Philippines - Malampuson ug hapsay ang eleksyon sa syudad sa Danao diin walay nahitabong mga insidente nga aduna’y kalambigitan sa eleksyon niadtong Lunes.

Ang syudad sa Danao adunay 78,972 nga mga rehistradong botante apan 59,440 ka botante lamang ang mibotar niadtong Mayo 10.

Wala’y nasugatang mga dagkong problema ang mga BEI sa maong syudad kabahin sa labing unang automated election gawas sa mga reklamo sa kalangay sa sistema nga ilang gipatuman.

Giproklamar na usab sa mga Board of Canvassers ang bag-ong mayor sa maong siyudad nga si Ramon “Boy” Durano Jr. nga milabaw og 13,767 ka botos batok sa iyang igsoon nga si Jesus Durano nga nakakuha lang og 20,829 botos.

Si incumbent mayor Ramon “Nito” Durano III ang giproklamar nga bise mayor human makaangkon og 46,680 ka botos batok kang Michael Enriquez nga mikuha lang 7,038 ka botos.

Sa pagka-kongresista midaug sab si incumbent Congressman Ramon “Red” Durano sa botos nga 40,539 batok kang Gilbert Wagas kinsa nakabaton og 812 ka botos.

Mahinumdoman nga ang syudad sa Danao giingong “Gibo Country” apan gipildi ra sab kini sa Liberal Party standard bearer nga si Senador Noynoy Aquino sa 24,299 ka botos batok kang Gilberto Teodoro nga nakakuha lamang og 21,297 botos.  – BANAT NEWS