CEBU, Philippines - Bisan pa man patay na ang midagang independenteng kandidato sa pagka-konsehal sa north district ning dakbayan nga si Crisistomo “Tata Negro” Llaguno, aduna gihapo’y mibotar kaniya atol sa piniliay.
Base sa partial ug unofficial tally nga nakuha gikan sa website sa GMA News. tv alas-2 pasado sa hapon kagahapon, si Llaguno nakakuha pa og 10, 145 botos.
Ang campaign manager nga si Ramon Resma dihang nahinabi sa Banat News kagahapong adlawa nagkanayon nga kini nagpakita lamang nga maayong tawo si Tata Negro.
“Nagpakita lang na siya nga maayo si Tata Negro, klaro naman unta kaayong modaug unta siya kung buhi pa siya, unya amo na pud nga nahunong ang kampanya pagkamatay niya, so nabiyaan na gyud namo, wa na namo mapadayon,” butyag pa ni Resma.
Si Resma mapasalamaton sa mga tawong mibotar kang Tata Negro bisan pa man sa gidangatan niini.
“Gusto kong magpasalamat sa mga tawong misuporta niya bisan pa man og namatay na intawon si Tata. Kahibawo ko nga pinangga gyud na siya sa mga tawo,” dugang ni Resma.
Si Llaguno gihulagway sa mga kasilinganan nga susama sa sikat nga si “Robinhood” sa karaang panahon sa Britanya gumikan sa pagkamatinabangon niini sa iyang mga kaila.
Mikwestyon ug gisaway ni Resma ang mga kaatbang ni Llaguno tungod sa report nga ilang nadawat nga ang ubang kandidato sa pagkakonsehal nangampanya sa katawhan nga dili na pabotaran si Llaguno tungod kay patay na kini. “Nganong ila mang ikampanya sa mga tawo nga dili nila pabotaran si Tata? Gusto lang unta nako nga ilang i-respeto ang patay’ng lawas ni Tata Negro. Dili unta nila hilabtan ang hukom sa mga tawo,” ni Resma pa.
Si Resma mibutyag nga usa sa mga barangay nga gikampanyahan sa kaatbang ni Tata Negro mao ang barangay Ermita ug adunay mihimo niini diha mismo sa mga voting precincts. - BANAT NEWS