Granada lingkod na gyud; Baquerfo napilde na gyud

CEBU, Philippines - Pormal nang nakalingkod si Mayor Demetrio Granada sa munisipyo sa lungsod sa Tudela isla sa Camotes kagahapon usa ka adlaw human gyud sa election niadtong adlaw’ng Lunes.

Kini human hingpit nga gipatuman sa Commission on Elections ang kamanduan sa Korte Suprema nga nagmatuod nga si Granada maoy tinuoray’ng mananaog sa pagkamayor sa lungsod sa Tudela niadtong 2007 election.

Apan wala madali ang paglingkod ni Granada sa municipal hall sa iyang lungsod ug pakanaugon ang kasamtangang naglingkod nga si mayor Rogelio Baquerfo tungod kay mitumaw ang gamay’ng tensyon.

Dihang gibabagan sa mga supporter ni Baquerfo ang mga sakop sa Comelec diha sa municipal building.

Ang report nagkanayon nga nagkinahanglan pa og Crowd Dispersal Unit gikan sa PNP ang Comelec ug court sheriff aron pagbungkag sa mga tawo ug hingpit nga pagpakanaug kang Baquerfo.

Si Baquerfo nagdumili unta sa pagkanaug sa iyang katungdanan sulod sa pipila na ka bulan, wala na lamang mamugos dihang may gipakitang kamanduan gikan sa Comelec nga ipatuman sa court sherrif ang kamanduan sa Korte Suprema.

Si Granada nagkanayon nga ang iyang himuon sa usa ka bulan niyang termino mao ang paghiuli sa tanang mga pundo sa munisipyo nga giingong gigamit sa mikanaog nga mayor.

Dili na usab makabalik si Baquerfo sa Hulyo sanglit napildi man usab kini sa batan-ong kandidatu sa pagkamayor nga si Erwin Polancos Yu ug samtang si Granada napili usab nga konsehal ug na reelected si Vice Mayor Clint Maratas.  – BANAT NEWS