Igsuon sa kandidato gipasanginlang nagpaarak og machine gun

CEBU, Philippines - Igsuon ni Antonio “Abby” Canoy, mayoralty candidate sa lungsod sa San Fernando gipasanginlang nagpabuto og machine gun aron hadlokon ang mga supporter ni incumbent mayor Lakambini “Neneth” Reluya kagahapon sa kaadlawon diha sa sitio Campawog, barangay Pitalo.

Si Reluya nga nahinabi sa mga tigbalita kagahapon mibutyag nga nangahadlok ang ilang mga supporters diha sa maong lugar tungod sa gibuhat ni Rey Canoy, manghod sa iyang kaatbang.

Matud ni Reluya nga si Rey usa ka retiradong polis ug gikahadlukan diha sa San Fernando. Gikatahong gihurot niini og paarak ang usa ka magazine apan wala kini itumong og mga tawo.

Si Reluya mipasangil usab nga ang tanod diha sa sitio Pantalan, barangay South Poblacion nga si Jaime Pandera nga ilang kaalyado giingong gihasi usab sa manghod ni Canoy.

Si Reluya nagkanayon nga nabalaka siyang si Canoy ug ang iyang bana mag-abot ug mahitabo ang dakung gubot.

Ang San Fernando dunay 21 ka barangay diin 15 lang ka barangay ang kaalyado ni Reluya.

Ang mga tigbalita miadto sa balay ni Canoy aron makuhaan kini og pamahayag kabahin sa maong mga pasangil batok kaniya apan ang misugat sa mga tigbalita mga blue guards nga nagkanayong dili magpa-interview si Canoy tungod kay nangandam kini paingong mobotar.

Ang hepe sa kapolisan sa lungsod nga si Sr. Insp. Jaime Santillan nga nahinabi sa Banat News kagahapon nagkanayon nga wala sila makadawat og reklamo bahin niini. (BANATNEWS)