Diskwalipikasyon ni luigi bakak - Abogado

CEBU, Philippines - Mikatap kagahapon atol sa election ang usa ka gihulagway nga pekeng desisyon gikan sa Commission on Elections nga nag-disqualify kang kanhi provincial board ug 6th district congressional aspirant Luigi Quisumbing.

Apan ang mga abogado ni Quisumbing daling mideklarar nga tumutumo ug fake ang nahisgutang resolusyon sa Comelec Manila nga isyu niadtong Mayo 5, 2010 nga nagpabor sa petition for Quo Warranto nga giduso sa usa ka Jaime Flores nga nag-disqualify kang Quisumbing tungod kay wala kini makakuha sa usa ka tuig nga residency requirement.

Sigon sa tulo ka pahinang ‘resolusyon’ gituhuan niini ang petisyon ni Flores nga si Quisumbing nagpuyo sa Maria Luisa Subdivision, sa Banilad Cebu City ug ang residensya niini sa may A.S. Fotuna St. Mandaue City usa lamang ka "clubhouse."

Ang tigpamaba sa kampo ni Quisumbing nga si Atty. Deolito Alvares miingon nga mini ang maong dokumento tungod kay walay pending nga kaso ug reklamo batok ni Quisumbing.

Matud pa ni Alvares nga lisod kaayong tuohan ang desisyon tungod kay wala gyud sila makadawat og kopya sa petisyon ug notisya gikan sa Comelec nga dunay susamang reklamo batok sa iyang kliyente.

Wala usab sila sukad makatambong og hearing labot sa maong kaso ug gikwestyon usab nila ang petsa pagpagawas niini nga Mayo 5, 2010, tungod kay sigon sa balaod, resolbahon sa Comelec ang tanang petisyon, reklamo batok sa mga kandidato 15 ka adlaw sa dili pa ipahigayon ang piniliay.

Nagduda si Alvares nga “binuang ug binastos” ang gibuhat sa ilang mga kaatbang sa politika, apan nagdumili kini paghingalan kanila apan mibutyag nga nakaila sila niini lakip na sa tawong nagmotorsiklong nagpakatap niini ingon man ang plate number niini.

Dugang pa ni Alvarez nga wala maapektohi si Quisumbing sa maong ‘binuang’ apan iyang gitataw nga ila gyung gukdon ang mga tawong nagpasiugda niini.

Si Mandaue City election officer Marchel Sarno nagkanayon nga wala sila makadawat og resolusyon sa Comelec Manila nga sama sa gipakatap sa kadalanan.

Iyang gitataw nga ang iyang buhatan nangayo og beripikasyon ngadto sa Comelec Manila na mismo apan wala silay kasayuran sa maong resolusyon ug misaad nga moimbestigar niini. (BANATNEWS)