CEBU, Philippines - Nagkadaiyang mga problema ang nasugatan sa piniliay kagahapon diin pipila niini mao ang pagkadelatar sa pagbotar tungod sa teknikal nga problema sa mga precinct count optical scan (PCOS) machines.
Sagad sa mga problemang nasinati mao ang kalit nga pagkapalong sa mga makina, problema sa backup memory, compact flash cards, overheat, ug ang pag-ungot ug pagluwa sa balota.
Matud pa sa kasayuran nga nahipos sa grupong Pagbabago pipila ka mga dapit nga nakasugat og problema sa PCOS machine naglangkob sa Opao, Labogon, Paknaan sa Mandaue City, Central School sa Consolacion, Pahina Central Elementary School sa Dakbayan sa Sugbo, Cordova Central School, Agujo Elementary School sa Daanbantayan, Sibonga Central School, Argao Elementary School ug Camputhaw Elementary School.
Nakasinati usab sa maong problema ang Gebitngi ug Kawit sa Medellin, ug ang pipila ka dapit sa Oslob ug Bogo.
Daghan usab ang wala mahimuot sa kahinay sa dagan sa botasyon sa Guadalupe Elementary School, Bangbang Elementary School sa Cordova , Lapulapu Central School ug nasayran nga pipila ka mga botante ang naglisod sa pagpangita sa ilang mga precinct number.
Hinuon ang tanang problemang teknikal nasulbad ra hinuon human mangabot ang backups nga makina ug ubang paraphernalia nga depektoso apan nasagmuyo ang mga botante gumikan sa kalangay.
Sa Lahug Elementary School, nagkagubot ang mga tawo gumikan sa pag-inilogay og priority numbers.
Samtang nasigpatan usab sa pipila ka mga polling precincts ang mga foreign observers apan nagdumili pakighinabi sa mga sakop sa media. (BANATNEWS)