PCOS machine gigamita'g generator

CEBU, Philippines - Tulo ka mga gagmay’ng pulo sa Isla sa Olango, sa dakbayan sa Lapulapu mogamit og generator ug Solar Energy system sa pagpaandar sa ilang mga PCOS machine atol sa piniliay karong adlawa.

Matud pa ni Benjie Dayondon sa Comelec Lapulapu nga atol sa ilang gihimong “Testing and Sealing” sa mga PCOS machine nga gipanghatod ngadto sa Isla sa Olango ug sa main land sa dakbayan sa Lapulapu, kagahapon, wala sila’y nasugatang problema sa maong mga makina.

Gani atol sa field testing nagtukma gyud ang mga resulta sa PCOS ug manual counting nga ilang gihimo ug nalipay kaayo ang mga magtutudlo.

Samtang sa mga gagmay’ng pulo sa Cauhagan, Caubian ug Pangan-an nga mga barangay nga sakop sa Isla sa Olango, nga pulos wala’y mga kuryente, gigamitan og mga generator ug solar energy ang ilang mga PCOS machine sa pagpaandar niini.

Matud pa ni Dayondon, ang isla sa Pangan-an mogamit na og solar energy sugod sa alas 10:00 sa buntag, hangtod na sa gabii.

Aron masiguro nga wala’y palyar, giandaman usab og extra nga bateriya ang ilang generator para sa mga PCOS machine.

Ang mga magtutudlo sa Cauhagan, Caubian ug Pangan-an gipanghatagan na sa Comelec sa ilang mga election material gumikan sa kalayo sa maong dapit.

Gani kun hunas ang dagat dili makalabang ang pumpboat sa maong mga dapit. – BANAT NEWS