Motor versus motor 1 namatay

CEBU, Philippines - Usa ang patay ug duha angol dihang nagkabinanggaay ang motorsiklong nagkasugat diha barangay Mojon sa lungsod sa Sogod kagahapon sa alas 3:00 sa kaadlawon.

Ang biktima mao si Diomel Dequino, 21, nagpuyo sa maong lugar samtang naangol ang gikabangga niining si Dioric Mahusay, 18, taga barangay Cabangajan, Sogod.

Lakip sa naangol mao ang angkas ni Dequino nga si Warren Modequillo, molupyo gihapon sa maong lugar.

Matud pa ni SPO3 Reynaldo Branzuela sa Sogod Police dihang nahinabi sa Banat News, si Dequino ug Modequillo paingon sa barangay Cabangajan dihang gikabangga ang paspas kaayong nagpadagang si Mahusay nga pulos walay sul-ob nga helmet.

Tungod sa kakusog sa panagbangga pulos nangalabay ang duha ka drayber ug angkas sa motorsiklo apan nagrabehan si Dequino tungod kay nabunal ang ulo niini sa semento.

Ang mga naangol pulos nalandig sa Juan Dosado Hospital apan si Mahusay ug ang angkas nga si Modequillo sa paghimo niining balita gihulagway nga talandugon pa ang kahimtang.  – BANAT NEWS