Malacañang itakling malinawon

CEBU, Philippines - Si Presidente Gloria Macapagal Arroyo mipasalig sa hapsay nga pagtakli sa iyang gahum ngadto sa bag-ong mapili nga pamuno nasud karong adlawa, sumala kang Gary Olivar, ang tigpamaba sa Malacañang.

Gibutyag ni Olivar, ang pamahayag ni Presidente Arroyo nga human sa eleksyon, itunol sa iyang administrasyon ang tanang rekurso bisan kinsay mananaog nga kandidato sa pagka-presidente ug mopuli kaniya sa paglingkod sa Malacñang.

Kini tungod kay iyang gipaniguro ang malinawon ug malampusong eleksyon karon, busa hapsay usab kaayo ang pagtakli sa iyang gahum ngadto sa mopuli kaniya.

Sa ingon niini mapreserbar ug magpadayon ang mga proseso sa institusyong republika sa nasud, sumala ni Olivar.

Sumala kang Olivar nga ang Malacañang miduyog karon sa tibuok nasud sa pangaliya ug pag-ampo alang sa malampusong pagsubo sa labing moderno nga automated election, ang lig-ong gisaad sa Pamuno nasud sukad pa niadtong 2001. 

Matud pa ni Olivar nga pinaagi sa mga kapolisaan, sundawo, ug mga magtutudlo, ubos sa pagpanguna sa Comelec, uban sa kaliboan ka mga boluntaryo, masaligon ang Malacañang nga dili mapakyas ang labing gipaabot sa tanan nga piniliay sa nasud karong adlawa.

Giawhag ni Olivar ang katawhan nga mobotar segun sa diktar sa ilang konsiyensya.

Ang boto nga ibaligya, isipon nga usa ka walay pulos nga boto kay ang tarong nga botante, mapilde man kun makadaog ang iyang kandidato andam, niya kining barugan uban sa pagtuo nga ang iyang gipili nga kandidato maoy haum ug tukma sa katungdanan.

Matud pa ni Olivar nga ang eleksyon karong adlawa gibantayan sa tibuok kalibotan ug kapahimuslan kini sa mga batan-on kinsa naniid sa kalampusan sa modernong kasangkapan nga gigamit sa unang higayon sa kasaysayan sa piniliay sa nasud.

Busa aron mahimong makasaysayanon kining maong piniliay, kinahanglang ihalad sa tanan ang ilang paningkamot nga mapreserbar ang kalinaw ning usa ka sagradong gimbuhaton karong adlawa. – BANAT NEWS