Hinakutay og botante monitoron

CEBU, Philippines - Gibantayan sa Commission on Elections ang mga sakyanang gipanag-iya sa gobiyerno nga posibleng gamiton sa hinakutay og mga botanteng supporters sa mga lokal nga kandidato gikan diha sa kabarangayan padulong sa polling areas.

Giklaro hinuon sa Comelec nga walay dautan niini basta patas lamang ang pagtratar ngadto sa manakay.

Si Rudy Gilos, election officer sa Comelec Cebu City North District mipasabot nga walay problema niini kung walay pili ang pagpasakay mapa-administrasyon man o mapa-oposisyon nga supporter.

Matud pa niini numero unong dunay responsibilidad paghakot sa mga botante mao ang barangay level nga “supposed to be a non-partisan group” o walay gipaboran.

Apan namatikdan nga bisan ang mismong mga nagdala sa mga sakyanan sa barangay dili usab maayo og tinagdan ngadto sa mga naila nang supporter sa kaatbang.

Mipasidaan si Gilos nga kun adunay moreklamo nga ‘pilion’ lamang ang pasakyon mahimo nila kining paimbestigahan pinaagi sa pagduso og pormal nga reklamo sa ilang buhatan.

Si Gilos midugang nga ang usa ka kandidato gidid-an sa pag-hire o pag-abang og sakyanan nga masakyan sa iyang mga kaalyado tungod kay matawag na kining “vote buying.” – BANAT NEWS