CEBU, Philippines - Adunay mga balotang wala dawata sa Precinct Count Optical Scan, kon PCOS machine samtang adunay wala maka-operate tungod sa kalit pagkasunog sa baterya, pipila lang kini sa mga nasinating aberya sa pagpahigayon sa testing and sealing kagahapon.
Diha sa Mambaling Elementary School, 190 ka mga botante ang misuway pagbotar ug nasuta dayon nga ang hinungdan sa pagsuka sa balota mao ang paglapas sa pag-shade sa ‘itlog.’
Aron usab nga masiguro ang kahapsay atol sa piniliay, aduna’y ipanghatag nga mga priority numbers sa mga botante aron dili magkagubot sa pagsulod sa mga presinto.Samtang duha ka PCOS machines sa barangay Tuyom ug Poblacion III sa dakbayan sa Carcar nagkaproblema.
Si Mariella Remoriza, election assistant sa dakbayan sa Talisay mitug-ang nasunog ang baterya sa PCOS machine sa barangay Lagtang human aksidenteng napatiran, hinuon nailisan ra kini dayon.
Susama gihapon ang nahitabo diha sa San Nicolas Elementary School dihang atol sa iyang paghipos sa baterya sa PCOS machine kalit miaso ang baterya apan nailisan ra usab dayon. – BANAT NEWS