Strafing sa Bogo 1 angol; Tabuelan Tensyonado

CEBU, Philippines - Misamot na og kainit ang politika sa dakbayan sa Bogo sa ikaupat nga distrito human maangol ang usa ka hepe sa mga tanod dihang girakrakan ang iyang panimalay diha sa barangay Cayang pasado ala-una sa kaadlawon kagahapon, samtang laing pagpangrakrak ang natala sa lungsod sa Tabuelan.

Si Crisanto Ochea, 54, chief tanod sa barangay Cayang sa Bogo nakaangkon og samad pinusilan sa iyang buko-buko ug abaga human kalit girakrakan sa wala mailhing mga tawo ang panimalay niini.

Si Ochea gikatahong kaalyado sa kampo ni Bogo Mayor Celestino “Junie” Martinez.

Sa pakighinabi sa Banat News ni PO3 Allan Dosdos, nga nangatulog ang biktima ug asawa dihang kalit silang girakrakan gikan sa gawas hinungdan nga mikamang sa ilawom sa higdaanan ang magtiayong Ochea aron pagtago.

Diha palang niya mabatyaging mingulngol ang iyang bukobuko ug abaga ug nagpatabang sa mga silingan ug nagpahatud sa Juan Dosado Verallo Hospital.

Nakuha sa crime scene ang 50 ka kabhang sa balas a M16, 16 ka kabhang sa 7.36x29 MF Ace diin gihulagway usab ni Dosdos nga karun pa siya makakita og klase sa bala ug dose ka deformed slug.

Si Sr. Supt. Erson Digal, director sa Cebu Provincial Police Office mibutyag nga mao pa kini ang labing unang insidente sa pagpangrakrak nga iyang nahimamat nga adunay samaran.

Ang kapolisan misubay karon sa impormasyong nakakita og lalis ang biktima sa kampo sa mga Salimbangon.

Samtang sa lungsod sa Tabuelan, laing pagpangrakrak ang natala sa kapolisan human gipasanginlan sa kapitan sa Canlonhangon lungsod sa Tabuelan nga si barangay kapitan Carlito Rondina Jr., 26, ang unom ka mga lalaking misuway pagpangrakrak kanila atol sa ilang pulong-pulong.

Gitumbok ni Rondina mao sila si Oscarito Galbin, Ramil Baring, Leonilo Laquigan, ug usa ka Brendo ug laing duha ka wala pa mailhing lalaki nga giingong mga sakop ni Tabuelan ABC president Deolito Almonacin.

Atol sa meeting, kalit nga miabot ang unom luwan sa tulo ka motorsiklo, usa sa mga sakay niini giingong nadunggan nilang miingon “Tua ra ang kapitan ay,” dayong tudlo kang Rondina.

Nakabantay si Rondina ug unang nakapabuto sa iyang armas ngadto sa mga suspek kinsa dali usab misutoy palayo.

Sila si Chief Supt. Lani-O Nerez uban ni Digal ug provincial Comelec officer personal nga miadto sa balay ni Almonacin sa barangay Kantabaon aron pagsusi sa lugar.

Si Almonacin gipangita na sa kapolisan human makuhai og mga armas ug naaresto ang siyam ka mga gipasanginlang goons niadtong milabay’ng semana sa iyang balay.

Mimando si Nerez kagahapon nga pabutangan og detachment ang maong dapit aron masiguro ang kaluwasan sa mga residente ug alang sa malinawong piniliay karong adlawa. Nakakuha usab og usa ka .45 caliber pistol ug 16 live bullets sa usa ka barangay multicab nga sakyanan diha sa balay ni Almonacin atol sa hot pursuit operation kagahapon sa hapon.  – BANAT NEWS