Cuenco suportahan sa kapitan

CEBU, Philippines - Human sa taud-taod nga pagpakahilom, pormal nang gipahibawo ni outgoing Cebu City south district Congressman Antonio Cuenco ang mga kandidato nga iyang suportahan sa eleksyon ugma.

Atol sa gipatawag nga tigum sa 29 ka mga kapitan sa barangay didto sa pinuy-anan ni kongresista Cuenco sa miaging gabii, ang maong mga lider sa barangay mipasalig nga suportahan usab nila ang   mga kandidato nga gisuportahan sa kongresista.

Sa maong higayon pormal nga gipahibawo ni Cuenco ang iyang suporta sa standard bearer sa Liberal Party Senador Benigno “Noynoy” Aquino III uban sa runningmate niini nga si Senador Mar Roxas ug mga kandidato sa pagka -senador nga naglakip sa mga Sugbuanon nga sila si kanhi senador Vicente Sotto III, kanhi senador Cerge Osmeña ug kanhi Gov. Emilio Lito Osmeña.

Samtang gipahibawo usab ni Cuenco ang iyang pagsuporta sa tanang kandidato sa Bando Osmeña Pundok Kauswagan (BOPK) gikan kang Bise   Mayor Michael Rama nga maoy standard bearer sa partido uban sa iyang runningmate nga si Joy Augustus Young, Mayor Tomas Osmeña sa pagka- kongresista sa south district ning dakbayan ug sa tibuok line-up sa mga konsehal sa partido.

Duha ka bug-at nga rason ang gisaysay ni Cuenco ngadto sa mga kapitan ug sa mga sakop sa media nga mitambong sa maong miting , nga usa niini mao ang kasuod niyang higala sa mga ginikanan ni Noynoy nga sila si kanhi senador Ninoy Aquino ug kanhi Presidente Cory Aquino.

Samtang ang laing katarungan mao ang paghulagway niya ni Noynoy nga maoy labing haom sa tanang kandidato nga modumala sa nasud.

Samtang gipasabot usab ni Cuenco ang iyang pagsuporta sa mga kandidato sa BOPK ilabina kang Mayor Osmeña nga maoy gusto niya nga mohulip kaniya isip representante sa habagatang distrito sa dakbayan sa Sugbo ngadto sa Ubos Balay Balauranan tungod kay nagtuo siya nga mas haom ug dunay kasinatian ang mayor itandi sa iyang kaatbang nga si magpapatigayong Jonathan Guardo.

Nunot niini nalantawan ni Cuenco ang landslide nga kadaugan sa tanang kandidato sa LP ug sa BOPK ugmang adlawa, kun sa manok pa, nganong mopusta man ta sa pildihunon, ari gyud ta sa inilog,” dugang asoy ni Cuenco. (BANATNEWS)