CEBU, Philippines - Gawas sa lungsod sa San Fernando diin adunay nasikop nga lima ka tawo niadtong Miyerkules kinsa giingong goons sa politiko, ang ubang mga dakbayan ug kalungsoran sa unang distrito sa probinsiya, walay mga natalang hitabo nga may kalambigitan sa politika.
Sa dakbayan sa Talisay si Superintendent Elmer Lim ang officer-in-charge sa Talisay City Police Station nagkanayon nga malinawon ang pagpaabot nila sa eleksiyon ugma .
Sama kang Lim, si Chief Inspector Jovito Canlapan hepe sa Minglanilla Police Station nagkanayon nga walay mga nahitabong krimen nga may labot sa politika sa maong lungsod.
Ang dakbayan sa Naga bisan kun anaa kini sa watch list sa Cebu Provincial Police Office (CPPO), matud ni Superintendent Henry Biñas officer-in-charge sa City of Naga Police Station nga hapsay ang ilang pagpaabot sa eleksiyon ug walay mga insidenteng nahitabo.
Si Senior Inspector Jaime Santillan hepe sa San Fernando Police Station nagkanayon nga gawas niadtong mga armadong tawo nga nasikop nila, wala nay laing nahitabo nga may labot sa politika.
Ang San Fernando nalakip usab sa watchlist sa CPPO.
Samtang si Superintendent Renato Malazarte, hepe sa Carcar Police Station mibutyag usab sa Banat News nga malinawon ang ilang pagpaabot sa eleksiyon ugma ug walay mga nahitabong kagubot nga may labot sa politika .
Ang hepe usab sa Sibonga nga si Inspector Alan Rosario mibutyag usab sa Banat News, nga hapsay usab ang ilang lungsod ug sama sa ubang mga lugar sa unang distrito sa probinsiya, walay mga nahitabong insidente nga may labot sa politika.
Ang mga tanod sa kabarangayan sa nahisgutang mga lungsod ug dakbayan ug uban pang mga multiplier force , gipabantay na usab sa mga tunghaan diin gipahimutang ang mga PCOS machine alang sa botasyon ugma.
Gumikan niini ang kapolisan sa maong mga lugar gipaubos na sa red alert status. (BANATNEWS)