Supporter ni Erap mibiya kay way budget

CEBU, Philippines - Usa ka kandidato sa pagka-bise mayor sa dakbayan sa Talisay miatras sa iyang suporta kang kanhi presidente Joseph Estrada tungod kay wala siya hatagi og budget alang sa mga watchers.

Ang Talisaynong si Tony Vargas nga nahinabi kagahapon sa Banat News nangangkon nga usa siya ka independenting kandidato sa pagka-bise mayor sa siyudad nga misuporta sa Partido ng Masa nga partido ni Estrada.

Apan karong wala siya hatagi og budget alang sa iyang mga watchers gibakwi niya kagahapon ang iyang pagsuporta kang Estrada.

Si Vargas nagpakita sa iyang kasagmuyo human niya mahibaw-i nga ang budget alang sa mga watchers giingong gihatag kini ngadto sa usa ka coordinator nga kandidato pagkamayor sa dakbayan sa Naga.

Hinuon matud niya nga mopadayon gihapon siya sa iyang kandidatura bisan pa og wala siya’y suporta gikan kang Estrada ug malaumon siyang modaog karong eleksyon.