CEBU, Philippines - Gipasidunggan ni Cebu Archbishop Ricardo Cardinal Vidal si Mayor Jonas Cortes og Pro-life Award nga plaque nga gitunol ni Rene Joseph Bullecer ang presidente sa Human Life International.
Ang paghatag gihimo atol sa miting de abanse sa Mandaue Team Party ug Liberal Party sa dakong hawan sa Park Mall sa reclamation area sa maong dakbayan niadtong Biyernes sa gabii.
Mitambong sa maong kalihukan ang mga supporter ni Cortes nga nanagsuot og yellow nga t-shirts nga may yellow nga ribbon nga miunong sa kalihukan hangtod sa ala l:00 ang takna sa kaadlawon.
Ang pasidungog gihatag gumikan sa giingong baruganan ni Cortes sa pagpreserbar sa kinabuhi sa tawo ug Konstitusyon.
Si Bullecer mipahibalong gawas sa maong pasidungog duna pay laing pasidungog nga personal nga itunol ni Vidal kang Cortes karong Mayo 27.
Si Cortes sa iyang pagpamulong wala makapugong sa kaugalingon ug mipabuhagay sa iyang pagsaway sa mga kaatbang nga nagpunay na lang og labay og lapok ngadto kaniya.
Gibatbat usab ni Cortes ang nagkalain-laing proyektong iyang nahimo sa dakbayan sama sa mga eskuylahan, mga karsada sa barangay, pagpaayo sa mga kadalanan, mga imburnal ug uban pa.
Nakapatukod siya og 26 ka mga Botika sa Barangay, annex building sa hospital, pag-atiman sa mga senior citizen, pagpang-apod-apod sa mikabat sa 15 mil ka mga health cards, mga programa sa kabataan, kababayen-an ug mga may apan sa panglawas.
Sa kalikupan gipatak-upan niya ang bukas nga labayanan sa basura bisan wala siya suportahi sa konseho.
Gihagit usab ni Cortes ang iyang mga kaatbang pinaagi sa pag-ingon nga kun nagtinguha siyang mapriso kaniadto gumikan sa paghatag niya og suweldo sa mga trabahante sa clean and green nga proyekto, karon andam siyang magpapriso tungod sa paghatag niya sa 9.2 ka ektaryang luna ngadto sa tinuoray’ng urban poor organization. (BANATNEWS)