CEBU, Philippines - Ang katawhan sa lungsod sa Aloguinsan gipaabot nga makatagamtam og kausaban sa ilang kahimtang kun mapili nga mayor sa maong lungsod si Greg Dealagdon, usa ka criminologist.
Sa pakighinabi sa Banat News, si Dealagdon mitataw nga usa sa hatagan g’yod niya og pagtagad mao ang paghimo og nindot nga pantalan sa ilang lungsod aron makatabang kini pagpalambo sa Aloguinsan.
Si Dealagdon miingon nga tungod sa kadaghan niya og higala nga naghupot og tag-as nga pwesto sa kagamhanan, sama ni Department of Transportation and Communication (DOTC) Secretary Leandro Mendoza, sayon ra siya nga makapangayo’g tabang alang sa kaayohan sa lungsod.
Kabahin sa problema sa kahusay ug kalinaw sa Aloguinsan, gitataw ni Dealagdon nga isip criminologist takus siya nga mohatag og sulbad sa maong suliran.
Apan labaw sa tanan gipasalig ni Dealagdon nga tabangan niya ang mga kabus nga taga Aloguinsan aron sila makakita og maayong trabaho dinhi sa dakbayan sa Sugbo panahon nga makalingkod na siya sa katungdaan.
Nalipay si Dealagdon nga sa iyang pagsuroy sa kabukiran sa Aloguinsan nasayran niya nga ang kinabag-an sa mga mag-uuma anaa kaniya misuporta. (BANATNEWS)