CEBU, Philippines - Gumikan sa isyu sa panglawas ni incumbent Cebu City Mayor Tomas Osmeña gikatahong nalabwan na og 10 porsiyento sa kaatbang niini pagkakongresista sa habagatang bahin sa dakbayan sa Sugbu nga si Jonathan “Atan” Guardo base sa ulahing survey nga gihimo sa habig sa Nacionalista Party.
Sa maong survey, si Guardo nakakuha og 53 porsiyento samtang si Osmeña 43 porsiyento.
Sa milabay’ng mga semana “neck to neck” ang ilang popularidad sa mga residente sa habagatang bahin sa dakbayan sa Sugbu apan sa ulahing survey diha sa kabarangayang balwarte ni Osmeña sama sa Guadalupe ug Calamba nagpakitang mas mipopular si Guardo.
Pipila sa mga rason sa mga gipangutana mipadayag nga gusto sila og bag-ong dagway nga maoy modala sa ilang tingog ngadto sa Kongreso ug ang uban mibutyag nga gusto sila og kasigurohang makatapos sa termino ang ilang representante.
Ang mayor kinsa nasakit og kanser sa pantog ug naoperahan sa Estados Unidos na-clear na sa mga doktor nga hingpit nang naalim, gani niadtong milabay’ng semana gipublikar sa mayor ang iyang medical record nga nagpakitang wala na siya’y sakit.
Apan bisan paman niini, ang isyu sa panglawas niini kanunay’ng mahisgutan sa iyang mga kaatbang ug bisan na sa iyang igsuong kandidato sa pagkamayor nga si Georgia Osmeña.
Sa milabay’ng Abril 30 ang Social Weather Station kon SWS mipagawas og resulta sa ilang survey sa Visayas partikular sa mga kandidato sa dakbayan sa Sugbu nga nagpakitang nakakuha og 45 porsiyento si Guardo samtang 39 lamang kang Tomas. - BANAT NEWS