Bangaw sa adlaw may dautang tilimad-on?

CEBU, Philippines - Nakapahingangha sa mga tawo ang dakong bangaw nga nagpalibot sa adlaw kagahapon sa udtong tutok, ang mga tawo nagpunay og hangad sa talagsaong talan-awon samtang ang uban nga dunay camera bisan sa cellphone lang nanguha gyud og picture.

Sigon sa mga tinuhuan sa kinaraan, kun aduna’y makitang bangaw palibot sa adlaw, aduna’y umaabot nga katalagman ug mahimo sab nga tilimad-on kini sa maayong umaabot nga mahitabo kini sa pagbunok sa ulan o ba kaha mas moinit ang temperature.

Sa pakighinabi sa Banat News kang May Casilaban, weather specialist sa Philippine Atmospheric, Geophysical and Astronomical Service Administration kon PAG-ASA, gitawag ang maong talan-awon kagahapon nga ‘optical phenomenon.’ “It’s natural, we have nothing to worry about it. It’s when the cirrus clouds, retracts to the ice crystals and forms halo. Ice crystals are responsible for various atmospheric optics displays,” matud pa ni Casilaban.

Midugang hinuon si Casilaban nga nahitabo na kini kaniadtong Abril 18 sa Ilocos Norte sa pareho gihapong hinungdan. Ang ubang mga nakasaksi, gibase ang panghitabo sa umaabot nga eleksyon, matud pa sa uban nga miuyon ang adlaw sa sitwasyon karon sa umaabot nga piniliay ug duna say miingong signos kini nga adunay dautang mahitabo.  - BANAT NEWS