PNP ug piskal gahina'g pundo

CEBU, Philippines - Gitinguha ni kanhi Dangerous Drugs Board (DDB) Undersecretary Paul Clarence Oaminal nga mabutangan og linaing pundo sa gobyerno ang kapolisan ug mga piskal sa gobyerno nga naghupot og mga kaso nga may labot sa gidiling drugas.

Kini tungod kay matud pa ni Oaminal nga sa pagkakaron wala gyuy igong pundo ang PNP Anti Illegal Drug Task Force sa pagpahigayon og mga drug operation.

Gani makagasto pa sa kaugalingon nilang kuwarta ang mga polis alang sa plite sa sakyanan kun motambong sila og husay sa mga kaso nga gisang-at nila batok sa mga madakpan nilang malapason sa balaod bahin sa ginadiling drugas.

Gawas sa plite sa sakyanan, ang pagpalit og load sa cell phone aron makakontak sila sa mga saksi,abagahunon usab sa polis, matud pa ni Oaminal.

Misaad siya nga unya na niya iduso ang maong sugyot kun modaug si kanhi DDB chairman Vicente Sotto III sa pagka-senador human sa eleksyon.

Midugang si Oaminal nga mosamot ka agresibo sa kapolisan paggukod ug pagsikop niadtong mga nalambigit sa mga transaksyon sa gidiling drugas kun magahinan sila og kaugalingong budget alang sa anti- illegal drug operation.

Gani gihulagway ni Oaminal nga bisan pa sa maong kakuwangan karon sa pundo apan daghan gihapon ang malampuson nga drug operation sa kapolisan nga misangpot sa pagsikop sa daghang mga tigpayuhot og gidiling drugas.

Si Oaminal kinsa kalit lang gipalagpot sa katungdanan isip DDB Undersecretary misaad nga ipadayon niya ang iyang adbokasiya paggukod ug pagbungkag sa suliran bahin sa gidiling drugas sa nasud. – BANAT NEWS