Villar-Mar paluyohan sa Magdalo

CEBU, Philippines - Giklaro sa Samahang Magdalo nga si Nacionalista Party presidential candidate Sen. Manny Villar maoy ilang paluyohan samtang si Sen. Mar Roxas sa Liberal Party maoy ilang suportahan sa pagka-bise presidente.

Si kanhi 1Lt. Francisco “Ashley” Acedillo ang national spokesman sa Magdalo ug kandidato pagka-kongresista sa north district sa dakbayan sa Sugbu mitug-an sa mga tigbalita.

Ang subling pagpadayag gihimo sa grupo gumikan sa migawas nga mga report nga nagtumbok kanilang adto sila mopaluyo ni LP standard bearer Sen. Benigno “Noynoy” Aquino III pagka presidente.

“Because of leadership, management and competence of Manny Villar are the reasons why Magdalo supports his candidacy as the next President of the Philippines,” matud pa ni Acedillo.

Susamang kinaiya usab ang ilang nakitang pagserbisyo ni Roxas hinungdan sa ilaha kining suportahan. Nanawagan si Acedillo sa mga Sugbuanong opisyal ug kandidatong hilom nga nagsuportang Villar nga mogawas ug ipadayag ang ilang pagsuporta.

Samtang kabahin sa isyu sa mental health sa usa ka kandidato sa pagkapangulo, uyon ang Magdalo paghimo niining maong “psychiatric test” sa tanang kandidato.

 Gibutyag usab ni Acedillo nga ang pagkaaberya sa compact flash cards sa mga Precinct Count Optical Scan kadudahan ug posibleng gamiton aron makapanikas.

Gumikan niini giawhag ni Acedillo ang militar ug kapolisan nga magmabinantayon atol sa ipahigayong testing sa dili pa ang piniliay.

 Giawhag usab niini ang Comelec nga moangkon kun dili gyud nila mahimo ang pagpatuman sa poll automation aron mahatagan pa og igong lugway sa pagpahiluna sa mga problema nga nasinati sa Smartmatic. Uyon usab ang Magdalo nga lugwayan nalang ang piniliay. - BANAT NEWS