3 supporters ni Carlo gipangulata ni Balodong

CEBU, Philippines - Tulo ka mga supporters   ni Nacionalista party vice mayoral candidate Carlo Pontico Fortuna sa dakbayan sa Mandaue mireklamong gipangulata ug gipamusil ni Ariston “Balodong” Cortes, kandidato pagka-kongresista sa ika-unom nga distrito ug sa mga sakop niini.

Mireklamo sa kapolisan silang Mark Kier Tumbiga, 24, Charlie Satumbaga, 23, ug Ronald Ouano, 16, mga residente sa barangay Guizo.

Sa press conference kagahapon, si Tumbiga miasoy sa mga tigbalita nga silang tulo uban sa laing 11 ka lalaki nga nagmonitor sa ilang posters tungod sa taho nga taptapan sa ilang mga kaatbang sa dihang pagsubay nila sa dalan M.L. Quezon sa Maguikay, nasugatan sila sa sakyanan ni Balodong Cortes nga gi-ubanan sa duha ka nagmotorsiklo.

Matud ni Tumbiga nga nanaog si Cortes sa Kia nga sakyanan ug uban sa iyang mga sakop misul-ob og bonnet ug misukmag sa drayber sa ilang grupo ug mibukbok si Cortes og pistola kang Ouano hinungdan sa pagkagisi sa walang aping niini. Si Satumbaga miingon nga gipusil sila niini apan wala maigo, ug ang mga kaubanan gipanumbag.

Misumbong sila sa Station 4, apan nalangay ang pagresponde sa kapolisan hinungdan nga wala na maabti ang grupo ni Cortes.

Si Balodong Cortes sa dihang nahinabi sa mga tigbalita mihimakak nga nangulata ug namusil ug mihulagway hinuon sa pasangil nga usa ka political propaganda sa ilang kaatbang.

Andam hinuon atubangon ni Cortes ang reklamo.

Si NP mayoralty candidate Nerissa Soon-Ruiz mikondenar sa gibuhat ni Cortes ug mihulagway niini nga buhat terorismo.

Matud ni Soon-Ruiz nga mas maayong tubagon sa igsuon ni Balodong nga si Mayor Jonas Cortes ang isyu kun asa gigasto ang budget nga P2.88 bilyones sa dakbayan sa Mandaue ug dili i-agi sa pagpangulata og mga tawo aron hikalimtan kini. – BANAT NEWS