CEBU, Phillipines - Lima ka armadong lalaki apil na ang usa ka tanod nga gidudahang goons sa politiko nadakpan sa mga sakop sa militar didto sa bukirang bahin sa Sitio Pangga, barangay Cabatbatan, lungsod sa San Fernando niadtong Miyerkules sa alas 11 sa gabii. Ang mga nadakpan mao sila si Nelson Caballero Obal, 36, taga Basak-San Nicolas, siyudad sa Sugbo; Jason Cabrera Berbajo, 23, gwardiya sa Deca Homes ug taga San Jose, siyudad sa Sugbo; Virgilio Mala Paraiso, 44, construction worker, taga Pardo; Jackson Belarmino Salas, 42, guwardiya sa Calahari Security Agency, taga Siwak, Pardo siyudad sa Sugbo ug ang tanod sa barangay Cabatbatan nga si Macario Sialmo Delima, 52. Matud ni SPO1 Francisco Salubre sa San Fernando Police Station sa dihang nahinabi sa Banat News nga si Caballero ug Cabrera nagtagsa og rebolber nga kalibre .38, si Paraiso nakuhaan og hait nga hinagiban diha sa iyang posisyon ug si Belarmino nakuhaan og .357 nga paltik.
Giapil og dakop ang tanod nga si Delima tungod sa pag-asikaso niini sa mga armadong grupo diha sa iyang pinuy-anan.
Subay sa inisyal nga imbestigasyon nga nagpatrolya ang mga sakop sa 78th Infantry Battalion sa Philippine Army sa alas 9:30 sa gabii pinangulohan ni Sgt. Jay Dayap sa dihang nakadawat og text message si 1Lt Lorenzo Siobal Jr. gikan sa nagpailang concerned citizen ug misumbong sa presensya sa armadong grupo sa maong lugar.
Sa daling pagresponde sa mga sundalo, naabtan nila ang mga suspetsado ug gisikop.
Sa laing bahin, nakabsan sa kinabuhi ang usa ka kahera sa botika human gipaulanan og bala sa dalan Juan Luna, barangay Poblacion siyudad sa Danao niadtong milabay’ng adlaw.
Si Rafflet Monte, 26, molupyo sa barangay Tuburan Sur, siyudad sa Danao, padulong na mopauli sa dihang gipara sa gisakyang traysikol sa wala mailhing mamumuno ug gipusil sa nawong ug liog. – BANAT NEWS